آن لائن دار الافتاء ( هډه وال ويب )‏

هډاوال ويب غواړي چي ستاسي اسلامي اندیښني تقویه کړي. اوستاسومسائل ته د قرآن اوسنت په رڼا کښی جوابونه ورکړې او د سپیڅلي دین اسلام په چوکاټ کښي تاسي ته خوږي قصي ، د زده کړي وړ لیکنی اومضامین ، عام معلومات ، په زړه پوري ټوکي ټکالي او جالبه او ښائسته مطالب وړاندي کړي.. https://www.facebook.com/pashto.islamic.mp3.bayanat

Thursday, July 7, 2011

رمضان او افغانان

رمضان یوه ډیره درنه او باعظمته میاشت ده او دا د ډیرو وجوهاتو او لاملونو له امله چې ستر لامل یې دا دی چې پدې کې قرآن کریم دغه د انسانیت د هدایت او لارښوونې لپاره د الله (ج) وروستۍ نسخه رانازل شوی دی ، نو ځکه خو باید مسلمانان په همدغسې یوه عظمت او درنښت ورته قایل شي او داسې چمتووالی او تیاری ورته ولري لکه چې ددغې میاشتې له شان سره ښایي او داسې هرکلی او استقبال یې وکړي لکه چې د هغه له مقام سره مناسب وي.

زه باوري یم چې په نورو اسلامي هیوادونو کې به دغه کار شوی وي، مسلمانو افرادو او اسلامي ټولنو به داسې فردي او اجتماعي پروګرامونه جوړ کړي وي چې دغه د خیر او فیض له موسم نه به سمه او عظیمه استفاده وکړي، په جوماتونو کې به د دیني درسونو او قرآني ختمونو لپاره د ښو اوازونو لرونکي او د تجوید په علم سمبال او د قرآن ښه لوستونکي حافظان او عالمان ټاکل شوي وي ، هلته به ان د شعبان له میاشت نه د کورونو، جوماتونو، تعلیمي ادارو ، تلویزیونونو ، رادیوګانو، ویب پاڼو او دسیمې له عام حالت او فضا نه داسې جوتیږي چې د یوه ستر میلمه، عظیم جشن، مهمې خبرې او فوق العاده مناسبت لپاره چمتووالی شوی دی.

زه چې اسلامي ویب پاڼې ګورم هره یوه یې د رمضان په اړه له درسونو، موعظو، تلاوتونو، انځورونو او ویناوو نه ډکه ده، که اسلامي تلویزونونه او رادیوګانې ګورم او اورم هم خبره همداسې ده.

افسوس د افغانستان په حالت!!

خو افغانستان ته به یو نظر وکړو، له بده مرغه دلته حالت د افسوس وړ دی ، ته به وایې چې یا خو دا د مسلمانانو هیواد ندی او خلک یې د کوم بل دین تابع دي او په اسلام کې د رمضان په حیثیت او مقام له سره خبر ندي او یا خو داده چې رمضان چاته چندان ارزښت نلري.

د رمضان نه یوه اونۍ وړاندې منتظر وم چې په دغه اونۍ کې به په تلویزیونونو او رادیوګانو د رمضان د رارسیدو په اړه زیري ، درسونه او عملي برنامې وووینم او واورم خو افسوس هماغه خرک او هماغه درک دی، سندرې ، ګډاګانې ، لوده بازار(خنده بازار) د ښځو بربنډې نڅاوې، پردي سریالونه او …روان دي او په رمضان کې به هم روان وي، ځکه چې څوک هم نشته کنټرول یې کړي،د دیني عالمانو شورا خو سیاسي شوې ده ، د اوقافو وزیر خو لا ما په تلویزون ندی لیدلی او د اطلاعاتو او فرهنګ وزیر خو له رمضان نه دوه ورځې وړاندې هم په دیموکراسۍ پورې نښتی وو او ځوانان او ځوانانې یې تشویقولې چې ښه سمه یې زده او تطبیق کړي!!.

د ښارونو فضا خو کاندیدانو لړلې ده، عکسونه او انځورونه دي چې هریو یې وینې نو شعار او کردار یې سره تضاد لري، شعارونه یې ( اسلام، وطن او سوله ) وي خو په حقیقت کې به عملا دغه درې واړه له همدوی نه بیزاره وي، د ښځینه کاندیدانوعکسونه خو داسې دي چې د مسلمان روژه پرې دوړه کیږي.

ویب سایټونه چې وګورو ټول پکې بې خونده لیکنې، انځورونه، تورونه ، دروغ او چټیات وي، یو عادي کار او مناسبت به وي نو په اړه یې ځانګړې لمانځ پاڼه جوړوي خو د رسول الله صلی الله علیه وسلم د تعریف، سیرت پیژندنې ، رمضان او بل دیني مناسبت په اړه بیا غلي وي، دغه حالت په ټولو افغاني ( پښتو او فارسي ) ویب سایټونو حاکم دی، یو ویب سایټ هم داسې نشته چې تاته ترې پته ولګیږي چې مونږ اوس په رمضان کې یو!!.

په جوماتونو کې بیا څه تیریږي؟

نو دلته هم د افسوس سره باید ووایو چې رمضان ته د هغه د شان او مقام سره مناسب تیاری نشته، په یوه جومات کې د رمضان داخلیدو په شپه ملاصاحب خلکوته وویل: خیر سبا ته خو په روژه کې شک ده خو مونږ او تاسې به تراویح وکړو او د نفلو نیت به پکې وتړو؟؟ هغه بل جومات کې یې د قرآن کریم ختم پیل کړی وو او ملاصاحب په ډاډه لهجه پخوا لدې چې چیرته میاشت ولیدل شي ویلي وو چې زه سل په سله کې پدې باور یم چې سبا ته روژه ده.

زه چې له جومات نه راووتم نو په کوڅه کې هم خلک ولاړ او هک پک وو چې سبا ته به څه وي، روژه او که بوزه؟؟ زه نه پوهیږم چې ولې د اوقافو وزارت پدې اړه خلکو ته د تلویزیونونو له لارې داسې معلومات نه ورکوي چې د دوی شک پکې لرې شي، زه یقین لرم چې د رمضان په لومړۍ ورځ به هم د ډیرو خلکو روژې ګډې وډې شوې وي.

تراویح او که خرپ او ترپ؟؟

په جوماتونو کې مو یا د تراویح لمونځونه پیل شوي دي او یا ختمونه، خو یو یې هم په سنت طریقه برابر ندي! تراویح خو داسې تیزې روانې وي چې د خشوع او خضوع لپاره پکې ذره وخت هم نه وي، خلک هم په امام پسې داسې ټیټیږي او جګیږي لکه چې په یوه ورزش او تمرین کې بوخت وي ، ښه ملاصاحب هغه وي چې په ۴۰ دقیقو کې یې خلاصې کړي! نو لدې نه فایده څه شوه؟ ولې په دومره عجلې سره؟ آیا امام ابوحنیفه (رح) به دغه ډول تراویح کولې؟؟ ولې داسې لمونځ وکړو چې ستړتیا مو په برخه کړي خو ثواب نه.

ختمونه هم اکثره داسې وي چې قاري صاحب پکې دوه نیمې، درې او ان څلور سیپارې وایي نو دی هم پکې داسې تیز ځغلي چې ته به وایي په صلوة خوف کې لګیا دی او ویره لري چې هسې نه دښمن مو لاندې کړي، ډیر ځله خو د قاري صاحب په تلاوت څوک نه پوهیږي خو چې کله ورو شي نو هلته به بیا ډیر مقتدیان وګورې چې ټیټیدو ته ځان جوړوي ځکه چې هغه یې همداسې عادت کړي وي،پوښتنه داده چې دغه سرعت ولې او دڅه لپاره؟ ولې هره شپه یوه یوه سیپاره نه وایي چې ښه کرار یې ووایي، هم د قرآن کریم ادب وشي او هم د لمانځه نه خوند واخلي.

په دغو ختمونو کې یوشمیرختم ته راغلي ځوانان بیا په کوڅو کې ولاړ وي ، سیګرټ وهي چې کله پوهیږي چې قاري صاحب کوزیږي نو منډه واخلي او ورپسې ودریږي او یا خو هم یو رکعت ترې تیر وي او بیا یې ځان ته کوي.

همدغه ستونزې دي چې افغانان له رمضان نه هیڅ ګټه هم نشي اخیستلی، روژه ددوی په اعمالو او کارونو کې هیڅ اغیز هم ونکړي او چې روژه تیره شي نو ان د اختر په ورځ هم د نارواوو مجالس ګرم وي.

هیله ده چې پدې اړه ټول اړوند لوري فکر وکړي او د اصلاح او سمون په هڅه کې شي.

منبع سورغر ورځپاڼه

آن لائن دار الافتاء ( هډه وال ويب )‏

Search This Blog

Labels

Thursday, July 7, 2011

رمضان او افغانان

رمضان او افغانان

No comments:

Post a Comment

البرامج التالية لتصفح أفضل

This Programs for better View

Contact Form

د هډه وال وېب , میلمانه

پیغام ورود و خروج

Daily Dars e Quran with Easy pashto translation word by word.