سیلاب

سیلاب

(( سیلاب راغى، منډه واخلئ، هغه دى كورونه او انسانان يې يووړل )) دا څومره لړزوونكې اوخورا له هيبته ډكې جملې دي، تاسې وواياست چې خلك به دداسې سويو نارو پر مهال په څومره چټكي سره دځان ژغورنې هڅه كوي؟؟؟ اوتاسې كله دا فكر له ځانه سره كړى دى چې پر دنيا سېلاب ولې راځي؟؟


په نړۍ كله ناكله سېلاب ځكه راځي چې مونږ دآخرت له ستر سېلابه خبر او نقشه يې په لاس راكړي اودا راوښيي چې پر تاسو تردې هم يو ستر سیلاب راروان دى چې دځمكې پر مخ به ټول ژوندي سري په ډېره لاپروايي سره له خپله ژونده بې برخې كړي، زمونږ ټول كلك اوسپنيز بندونه به رامات كړي اودغره په څوكه به هم څوك ترې خوندي پاتې نه شي.


د دنيا په سېلاب كې خو يواځې انسان د كښتۍ په مټ ځان ژغورلى شي، خوداسې خلك ډېر كم دي چې د آخرت له ستر سېلاب څخه يې د ځان ژغورنې له پاره څه اندېښنه كړې وي، د آخرت له سېلاب څخه به يواځې هغه څوك خوندي وي چې د ښه عمل كښتۍ يې لادمخه جوړه كړې وي .


مونږ په وار وار سره خداى پاك په خپل ستر كتاب او پيغمبر عليه السلام په خپلو ارزښتناكو لارښوونو كې ددغه ستر سېلاب په راتلو خبر كړي يو اومونږ ته يې له هغه څخه دژغورنې لارې ښودلي دي ، څو د آخرت په سېلاب كې ډوب شوي خلك دا ونه وايي چې مونږ چا د سېلاب په راتګ خبر كړي نه وو.


څرنګه چې اوس له پيغمبرصلى الله عليه وسلم نه وروسته بل پيغمبر نه راځي نوددغه ستر پيغام رسونه زمونږ دديني عالمانو يوه ډېره اړينه او سپېڅلې وظيفه ده چې خلك د ژبې اوقلم له لارې ددغه ستر سېلاب له راتلو دمخه خبر كړي اومخكې تردې چې دغه ستر سېلاب دژوند هرډول بندونه ونړوي چې بيا نه دبل چا د راويښوولو اونه په خپله د ويښېدلو يې وخت پاتې وي بايد خلك دمخه دغه سیلاب ته ځير كړى شي.


اسلام ته د بلنې ددې ستړې اغزنې لارې ستونزې بايد مونږ ناهيلي نه كړي اوكه مونږ دغه پيغام خلكو ته په ښه ډول ونه رسوو بيابه مو غاړې بندې وي.


حبيب الله قاسمي

سرچینه پښتواسلام