غبرګې نښتې نجونې وزېږدې

by عبدالمعيد هاشمي 

  on May 15, 2011 - 13:09

جلال اباد (پژواک ٢٥ غويى ٩٠): د ننګرهار د سرخرود ولسوالۍ يوې اوسېدونکې د ننګرهار د عامې روغتيا په روغتون کې په خېټه اوسينه کې سره نښتې دوه لوڼې وزېږولې.
د ننګرهار د عامې روغتيا د زېږنتون مشرې ډاکټر ذکيې رستاک د غويي په ٢٥مه پژواک خبري اژانس ته وويل، چې په زېږنتون کې يې د اته کلن خدمت پر مهال پر لومړي ځل حيرانوونکې پېښه وليدله.
هغې زياته کړه، چې د روان لمريز کال د غويي په ٢٣مه شپه ورته له سرخرود ولسوالۍ څخه يوه ناروغه مېرمن راوړل شوه.

د ذکيې په وينا، له تلويزوني معايناتو وروسته جوته شوه، چې ناروغه د غبرګو ماشومانو حمل لري

.

نوموړې وويل، چې د لويو عملياتو له لارې يې مور دغه غبرګونې انجونې دنيا ته راوړې.
د زېږنتون مشره زياتوي، چې دواړه ماشومانې تر دوه ورځني جدي مراقبت وروسته په نورمال ډول ژوندۍ دي او د مور شودې خوري.
د هغې په وينا، دغه نجونې د خېټې او سينې په برخه کې سره نښتې دي، چې هره يوه يې خپل جلا اندامونه، سر او زړه لري.
د ننګرهار د عامې روغتيا رييس ډاکټر باز محمد شېرزاد په يوه خبري کانفرانس کې له ولسمشر حامد کرزي او د عامې روغتيا له وزېرې وغوښتل، چې په هېواد کې د پرمختللې ټکنالوجۍ د نشتوالي له امله دې دا نښتې نجونې، نړيوالو روغتيايي مرکزونو او طبي څېړنيزو پوهنتونو ته ولېږي، ترڅو يې ژوند وژغورل شي.
هغه زياته کړه، په دې ډول، دغه په هېواد کې لومړى ځل دى، چې يوه مور دوه داسې نښتې ماشومان زېږوي، چې ټول اندامونه يې بشپړ دي.
د نوموړي په وينا، د جراحي عملياتو له لارې د بېلېدو په صورت کې د دواړو نجونو اتيا سلنه د ژوندۍ پاتې کېدو امکان شته.
د يادونې ده، چې دوه کاله وړاندې په دغه روغتون کې يوې مور داسې زوى زېږولى و، چې له خولې سره يې د سر په بڼه دويمه کتله نښتې وه.
د ننګرهار د عامې روغتيا د روغتون د معلوماتو له مخې، د ختيځو ولايتونو په کچه د ننګرهار د عامې روغتيا زېږنتون يو پرمختللى زېږنتون دى، چې په تېره يوه مياشت کې په دغه زېږنتون کې ١٧٠٠ کوچنيان دې نړۍ ته راغلي دي.

منبع : پژواک خبري اژانس